Noho ny fahasoavan’Andriamanitra dia natao ny alahady 26 mey teo ny fanokafana ny fankalazana ny faha-150 taonan’ny fahatongavan’ireo misionera voalohany teto Madagasikara tao amin’ny EEM Santa Paoly Ambatoharanana.

Ity hetsika manokana izay notarihin’ireo Eveka teo anivon’ny Eglizy Episkopaly Malagasy ity dia notronin’ireo mpitondra fivavahana sy solontena avy amin’ny diosezy rehetra eto Madagasikara.

Nanome voninahitra ny fotoana ihany koa ny delegasiona avy amin’ny Fanjakana notarihin’ny Solombavambahoaka avy amin’ny Governemanta Malagasy sy ny Antenimierandoholona Malagasy ary ireo vahiny nasaina avy amin’ny antokom-pivavahana hafa.

Tonga maro koa ny Kristianina, anisan’izany ny solontena avy amin’ny diosezy isan-karazany, niara-nivory mba hivavaka sy hanome voninahitra an’Andriamanitra noho ny fotoan-dehibe toy izany eo amin’ny fiainan’ny fiangonana.
Nandritra izany fotoana izany dia natokana ho fahatsiarovana io fotoana lehibe teo amin’ny tantaran’ny Fiangonana Anglikanina eto Madagasikara io ny tsangambato.

Araka ny nambaran’ny komitin’ny tsingerintaona dia hisy ny fankalazana nasionaly hafa hatao ao amin’ny Diosezin’i Toamasina amin’ny volana aogositra izao satria io no toerana nidiran’ny misionera voalohany.